MTANI WEWE KIBOKO NDIO UMEFANYA NINI SASA?

Mtani we kiboko, safari hii imenitolea mpya kabisa. Unajua tatizo la mtani wangu ni kuwa kaingia mjini wakati kishakuwa na ndevu, lakini anataka kujifanya eti yeye anayajua sana mambo ya mjini, na hapo ndipo anapojikuta anafanya mambo ya ajabu sana. Mtani sikiliza ushauri, we tulia tu maana kadri unavyolazimisha mambo ndio unachekesha zaidi. Mnakumbuka alichofanya mtani mwaka jana? Ilikuwa aibu, alipita kwa dobi akakuta dobi kaweka kibao nje, kimeandikwa shati shilingi mia mbili, suruali mia nne, koti alfu. Mtani wangu akaona hiyo dili kubwa, akaenda na shilingi alfu kumi kwa dobi anataka kununua shati ishirini, suruali ishirini na makoti matano akauze kwao, na chenji akamwambia dobi abaki nayo. Kwanza dobi alikuwa hakuelewa, baadae akatambua kuwa jamaa ushamba unamsumbua , si ndio akamtolea uvivu, baada ya kumlamba makofi mtani wangu ndio akamuelewesha kuwa zile ni bei za kufua nguo mbalimbali sio bei za kununulia nguo. Mtani karudi home uso umevimba. Sasa juzi mtani kalitia aibu kabila lake lote kwa mara nyingine. Mtani alipita kwenye duka moja lililokuwa linauza vifaa vya umeme, akaingia na kuuliza bei ya luninga moja aliyoiona kwenye dirisha la lile duka. Mwenye duka akamwambia  hauzi luninga, mtani wangu akondoka huku akitikisa kichwa. Baada ya siku mbili akarudi tena pale dukani na kuulizia bei ya ile luninga, mwenye duka akamjibu tena kuwa hauzi luninga. Hapo ndipo mtani akaamua kuliamsha dude, akamtukana sana mwenye duka kuwa ni mshamba hajui biashara, kwanini anakataa fedha, dude likawa kubwa akamtukana mwenye duka matusi yaliyohusiana na familia yake, timu yake ya mpira, kabila na mtaa wake, mambo yalikuwa makubwa mpaka yakafunga mtaa, ikalazimika mwenyekiti wa serikali ya mtaa aite askari mgambo wa mtaa wa pili. Baada ya kutulizana mzuka, mwenye duka akaeleza mkasa mzima, baada ya mgambo kumuuliza  kwanini hauzi hiyo luninga? Ndipo mwenye duka akajibu kuwa hicho kinachosemwa ni luninga, si luninga ni microwave. Mgambo akamchenjia mtani wangu akalambwa makofi mengi tu, kwa mara nyingine akarudi nyumbani uso umevimba tena. Mtani chonde chonde mambo ya mjini tuachie wenyewe ohoo.