WENYE MAPENGO SHKAMOO

Ndugu yangu nakwambia watu  wenye mapengo ni watu wa levo nyingine kabisa. Ukimuona mtu ana mapengo  mpe shikamoo. Mtu mwenye mapengo ni mtu shujaa, usijilinganishe nae kabisa. Wiki iliyopita niliamka fresh kama kawaida, nikatimka home na kwenda kwenye mishemishe mbalimbali. Mida ya saa sitasita kama kawa tumbo likaanza kudai mshahara wake, nikaingia kwa mama ntilie mmoja nikaagiza wali maharage na kikombe cha chai, mi napenda sana chai, hata saa sita ya mchana jua la Jiji la Dar halinishawishi kuacha kusindikiza wali maharage kwa chai, au hata chips mayai kwa chai kwangu safi tu. Basi nikaanza kuutendea haki wali ule. Nadhani kilikuwa kijiko cha saba au cha tisa nikiwa katika furaha kubwa si nikatafuna bonge ya jiwe kwenye wali? Tena nikatafunia jino ambalo lilishawahi kuanza kuuma uma kidogo, ndugu yangu hayo maumivu niliyoyasikia yalinifanya nisahau niko wapi, chozi likanidondoka bila kupenda mwanaume. Nikainama naugulia nangojea maumivu yapungue,wapii. Niliinuka na kuanza kuondoka  bila kulipa, na mama ntilie mwenyewe hakutaka hata kunidai alijua kuwa hilo kosa lake. Siku ikawa ndo imeharibika, nikapanda basi niikarudi home. Nikatafuta panado nikameza nikajilaza haikusaidia kitu, mama mmoja mpangaji mwenzangu mmbeya mmbeya akanambia ana mafuta ya karafuu nipake kwenye jino, nikapaka nikajilaza masaa yakapita jino halitaki kupoa. Giza likaanza kuingia mzee mzima machozi yalikuwa yanatoka bila aibu. Jirani yangu chumba cha pili ndio akatoa shauri nikang’oe. Sikubisha maana maumivu yalikuwa balaa, japo kichwani nilikuwa naogopa sana ishu ya kung’oa jino, lakini kwa maumivu niliyokuwa nayapata, nilikuwa tayari kwa chochote. Jirani akanisindikiza mpaka hospitalini, kufika kule tunaambiwa daktari wa meno hayupo mpaka kesho yake asubuhi. Tukageuza kurudi home kichwani nawaza ntawezaje kufika mpaka kesho yake asubuhi na maumivu makali yale? Ulikuwa usiku mrefu sana, akilini nilikuwa nawaza kuwa asubuhi mapema nawahi kung’oa jino. Alfajiri kama saa kumi na moja hivi nikapitiwa na usingizi, nikashtuka saa mbili na nusu. Jino limetulia, linauma kwa mbali.  Nikaanza kuona kuwa kung’oa sio muhimu kiviiile. Jirani akang’ang’ania ning’oe utadhani jino lake, ‘Ohh kang’oe bwana hilo jino litaanza kuuma tena’ na maneno mengine ya aina ile kupunguza kero nikakubali ntaenda hospitali. Basi kweli nikaenda hospitali  nikaandikisha kila kitu na kukaa kwenye foleni ya kusubiri kumuona daktari wa meno. Ndugu yangu foleni ile inatisha, mtu mmoja mmoja anaingia kwa dokta, halafu unasikia kilio humo ndani,'Aaaaaaaah', mwanaume mzima analia, kisha akitoka anatoka kwa hatua ndefu utadhani ana safari ya kwenda mji mwingine kwa miguu, kanuna, jasho linamtoka, aisee inatisha. Nikawa taratibu nasogea kadri watu walipokuwa wanapungua, hofu nayo ilinizidi. Kiukweli nilishindwa kuvumilia nilipoona nimefikia kuwa mtu wa tatu, niliulizia choo cha wanaume kiko wapi, nilipotoka hapo sikugeuka nyuma mpaka nilipofika home.  Jino bado  linanikong’ota kila siku tena siku hizi linaanza kuuma saa sita mpaka saba usiku, lakini kung’oa naogopa. Ndio najiuliza hivi hawa wenye mapengo wanaokubali kung’olewa hata meno manne ni mashujaa kiasi gani? Shkamoo wenye mapengo