NAMBA YA BABU UNAEMPIGIA HAIPATIKANI

Toka nilipokuwa mdogo nilikuwa naambiwa na wakubwa, ‘Usimcheke mwenzio akipata tatizo’, kiukweli nimekuwa najitahidi sana kufwata ushauri huo, lakini mara nyingine bwana nimekuwa nashindwa kujizuia kuna matatizo mengine yanachekesha  mno. Yaani kama ni rafiki yako kaja kukuhadithia, ingawa anatoka machozi, we unamsikiliza kwa makini halafu unamwambia unaenda bafuni ukifika huko unacheka halafu unarudi na sura flani siriaz, kisha unaendelea kumpa pole.  Sasa ngojeni niwambieni kisa fulani kimemtokea rafiki yangu  mmoja mjanjamjanja wiki iliyopita, yaani bado nacheka japo jamaa yangu akitokeza ghafla nakuwa siriaz, akijua namcheka patakuwa padogo nakwambia.

Huyu jamaa yangu ana tatizo moja kubwa sana, yaani kama vile haamini kuna Mungu, akiamka hana hela basi ataenda kwa mganga akaangalie nani kasababisha mkosi wa namna ile , akipata pesa lazima aende kwa mganga amtengeneze ili wabaya wasije wakazikwapua zile pesa kimiujiza. Akitaka kusafiri lazima akaague, akitaka kupata mpenzi mpya lazima aende kwa mganga, mimi nimeshamsema nimechoka. Najua lazima kishaenda kunicheki kwa wataalamu wake kama mimi nampenda au fiksi hilo nina hakika. Sasa  siku chache zilizopita akapata mesej ndefu kwenye simu yake, meseji ilionekana kama imekosea namba, ilionekana kama meseji imetoka kwa babu mmoja inaenda kwa mjukuu wake. ‘Mjukuu wangu hebu muulize rafiki yako kwanini hanilipi pesa yangu? Mimi nimemsaidia nimempa yule jini mpole kwa laki tano tu na ameweza kwa muda mfupi kumpa mabasi matatu na nyumba nne, sasa kwanini hanilipi? Mwambie zile nyumba zinaweza zote kupukutika, mkumbushe alipe deni upesi niishukuru mizimu’. Nakwambia  jamaa akaja kwangu macho yamemtoka, bila hodi wala salamu akaanza,’Bradha Mungu kanikumbuka, yaani kuna meseji ilikuwa iende kwa mtu mwingine imekuja kwangu na hii ndio itanitoa kwenye umasikini’. Basi akaanza kunisomea ujumbe ule, mi nikamuuliza sasa wewe unahusika vipi hapo? Akacheka kwa dharau na kunambia kuwa mie akili yangu iko sloo sana, akaniuliza kwa dharau ‘Hivi hujui hapa nimeshapata namba ya huyu babu?, kwa hiyo na mimi namtafuta ili anipatie na mimi langu jini nitajirike’. Duh kifupi nilijaribu kila njia kumkanya hakusikia. Sasa  toka juzi ananinisumbua huku analia machozi, eti aliwasiliana na yule babu vizuri, akaambiwa atume laki tatu za kufanyia kafala, baada ya kutuma tu pesa ile namba ya babu haiku tena hewani. Sasa jamani kwanini nisicheke?