Je rafiki zako wote binadamu?

Ni wazi teknolojia inagusa utendaji wa majukumu ya kila mtu, na kila kitu. Nimelazimika kutoa tamko hili baada ya kuona mambo kadhaa yanajitokeza ambayo, awali yalionekana kama hayatakuja kuyumbishwa na teknolojia lakini sasa ni wazi teknolojia imechukua mkondo wake. Katika kipindi cha miezi michache iliyopita, nimeweza kusoma hadithi zilizodaiwa kuwa ni za kweli kutoka magazeti yangu pendwa nisiyokubali kuyakosa kila siku ‘aka’ magazeti ya makolokocho, kuwa watu wameanza kuwasiliana moja kwa moja kwa njia ya text message, aka ‘kuchati’ na vitu ambavyo zamani ilihitajika kafala, na wazee maalum, taratibu maalumu tena katika maeneo maalumu ili kuweza kuwasiliana, na hata hapo ilihitaji watu maalumu kutafsiri mawasiliano hayo. Kwa maneno mengine watu wameanza kuwasiliana na majini direct kwa text message. Juzi nimesoma mdada ambaye aliaanza kuchat na jini, mpaka akatokea kumpenda na mpaka wakapanga wakutane gesti, na huko walikutana ila jinni alipoingia bafuni kuoga akatoka ameoza upande mmoja!!!!!!, sasa haya ni mendeleo makubwa sana kiteknolojia, kuwa hata majini wamekubali yaishe na kukubali kutumia mitandao yetu pendwa, najiuliza tu kama pia wameshasajili namba zao?

Zamani tuliambiwa majini walikuwa wanaogopa nguruwe, jana tu katika kijiwe kimoja nilipewa taarifa kuwa majini hawaogopi tena kitimoto wameshapata anti virus yake, hivyo kula KITIMOTO si kinga ya majini.

Pia swala la majini kuogopa bangi nalo linaoneana lina utata, kwani kuna rafiki yangu mmoja baada ya kuvuta bangi ndipo alipoanza kulalamika kuwa kuna jinni mahaba linamtaka.

 Swali je, kutokana na taarifa hii unauhakika gani kuwa rafiki zako wote wa Facebook ni binadamu?