CHEKANAKITIME YATOKELEZEA FRONT PAGE

Zile tuhuma zinazo muandama Mzee wa Cheka na Kitime, sasa zimefikia ngazi za juu. Leo hii tarehe 4 October 2012, picha yake imetolewa ukurasa wa mbele kabisa wa gazeti la Spoti Starehe umeonaee. Mwandishi wetu makini alipojaribu kumsaka huyu mzee kwenye simu yake hakupatikana, kwa kuwa imegundulika huyu Mzee kumbe haishi kwenye simu ya muandishi wetu makini asiyetetereka umeonaee. Hatimae mwandishi wa kike ndie aliyemnasa huyu Mzee akiwa kwenye ufukwe wa Coco ambako alikuwa akipata upepo mwanana na kula batamzinga. Alipoulizwa kulikoni kuonekana katika ukurasa wa mbele kabisa wa gazeti hili, alijibu kwa maneno yafuatayo. ‘Kwanza nadhani mtakuwa mmeshajua kuwa mimi sasa ni supasta, maana sisi masupasta peke yetu ndio huwa tunaonekana kwenye magazeti, ndio maana nimekuja hapa Coco Beach ili niwe na masupasta wenzangu, karibuni nitaanza  kutokelezea kwenye majukwaa nikiwa nacheza muziki, ila siwezi kuwa navaa zile za ndani zinazokuwa kama kandambili, ntavaa hizi kubwa kubwa. Pili ni ukweli usiopingika kuwa kiukoo niko juu maana ni mtu wa kwanza katika ukoo wangu kutokelezea katika ukurasa wa kwanza aka front page ya gazeti unaonaee. Ila nina tatizo na ile picha iliyotumika, maana kiukweli nilipigwa picha na kijana moja rasta hivi, ambaye anaendesha bodaboda (usiandike  hilo, mwenyewe hapendi). Huyu kijana last week walimtuhumu kuwa kafariki na michango haraka ikaanza kukusanywa na rafiki zake wapenzi, kumbe tuhuma hazikuwa za kweli kwa sasa anahangaika kupewa hiyo michango ili akanunue matairi mengine mawili, anasema akipata matairi tu, atakimodify kibodaboda chake kiwe kiVitz.

 Ene wei huyu rasta alikosea kupiga picha hivyo basi, sionekani ule utanashati wangu  wa kitaifa na kimataifa kama inavyostahili umeonaee’ Mwandishi wetu alipojaribu kugusia tuhuma zake za kuvunja watu mbavu, alikataa katakata  kwa mara nyingine na kutishia kuvunja kamera ya  mwandishi wetu badala ya mbavu unaonaee, mwandishi wetu mahiri  aliweza kukimbia haraka na kamera kwa staili ya swala japokuwa alivaa viatu vya mchuchumio vilivyokuwa vikinasa kwenye mchanga wa Coco Beach.